மார்ச் 9 : நற்செய்தி வாசகம்

உங்களுள் ஒவ்வொருவரும் தம் சகோதரர் சகோதரிகளை மனமார மன்னிக்காவிட்டால் என் தந்தையும் உங்களை மன்னிக்க மாட்டார்.

மத்தேயு எழுதிய நற்செய்தியிலிருந்து வாசகம் 18: 21-35

அக்காலத்தில்

பேதுரு இயேசுவை அணுகி, “ஆண்டவரே, என் சகோதரர் சகோதரிகளுள் ஒருவர் எனக்கு எதிராகப் பாவம் செய்துவந்தால் நான் எத்தனை முறை அவரை மன்னிக்க வேண்டும்? ஏழு முறை மட்டுமா?” எனக் கேட்டார். அதற்கு இயேசு அவரிடம் கூறியது: “ஏழுமுறை மட்டுமல்ல; எழுபது தடவை ஏழுமுறை என நான் உனக்குச் சொல்கிறேன்.

விண்ணரசைப் பின்வரும் நிகழ்ச்சிக்கு ஒப்பிடலாம்; ஓர் அரசர் தம் பணியாளர்களிடம் கணக்குக் கேட்க விரும்பினார். அவர் கணக்குப் பார்க்கத் தொடங்கியபொழுது, அவரிடம் பத்தாயிரம் தாலந்து கடன்பட்ட ஒருவனைக் கொண்டு வந்தனர். அவன் பணத்தைத் திருப்பிக் கொடுக்க இயலாத நிலையில் இருந்தான். தலைவரோ, அவனையும் அவன் மனைவி மக்களோடு அவனுக்குரிய உடைமைகள் யாவற்றையும் விற்றுப் பணத்தைத் திருப்பி அடைக்க ஆணையிட்டார். உடனே அப்பணியாள் அவர் காலில் விழுந்து பணிந்து, ‘என்னைப் பொறுத்தருள்க; எல்லாவற்றையும் உமக்குத் திருப்பித் தந்துவிடுகிறேன்’ என்றான். அப்பணியாளின் தலைவர் பரிவு கொண்டு அவனை விடுவித்து அவனது கடன் முழுவதையும் தள்ளுபடி செய்தார்.

ஆனால் அப்பணியாள் வெளியே சென்றதும், தன்னிடம் நூறு தெனாரியம் கடன்பட்டிருந்த உடன்பணியாளர் ஒருவரைக் கண்டு, ‘நீ பட்ட கடனைத் திருப்பித் தா’ எனக் கூறி அவரைப் பிடித்துக் கழுத்தை நெரித்தான். உடனே அவனுடைய உடன்பணியாளர் காலில் விழுந்து, ‘என்னைப் பொறுத்தருள்க; நான் திருப்பிக் கொடுத்துவிடுகிறேன்’ என்று அவனைக் கெஞ்சிக் கேட்டார். ஆனால் அவன் அதற்கு இசையாது, கடனைத் திருப்பி அடைக்கும்வரை அவரைச் சிறையில் அடைத்தான்.

அவருடைய உடன்பணியாளர்கள் நடந்ததைக் கண்டபோது மிகவும் வருந்தித் தலைவரிடம் போய் நடந்தவற்றை எல்லாம் விளக்கிக் கூறினார்கள். அப்போது தலைவர் அவனை வரவழைத்து, ‘பொல்லாதவனே, நீ என்னை வேண்டிக்கொண்டதால் அந்தக் கடன் முழுவதையும் உனக்குத் தள்ளுபடி செய்தேன். நான் உனக்கு இரக்கம் காட்டியதுபோல நீயும் உன் உடன்பணியாளருக்கு இரக்கம் காட்டியிருக்க வேண்டும் அல்லவா?’ என்று கேட்டார். அத்தலைவர் சினங் கொண்டவராய், அனைத்துக் கடனையும் அவன் அடைக்கும்வரை அவனை வதைப்போரிடம் ஒப்படைத்தார்.

உங்களுள் ஒவ்வொருவரும் தம் சகோதரர் சகோதரிகளை மனமார மன்னிக்காவிட்டால் விண்ணுலகில் இருக்கும் என் தந்தையும் உங்களை மன்னிக்கமாட்டார்.”

ஆண்டவரின் அருள்வாக்கு.

——————————————————

I தானியேல் (இ) 1: 2, 11-19

II மத்தேயு 18: 21-35

“அன்பு தீங்கு அனைத்தையும் மன்னித்து மறக்கும்”

மாவீரன் அலெக்சாண்டர்மீது மிகுந்த அன்புகொண்ட ஓவியன்:

ஒருமுறை மாவீரன் அலெக்சாண்டர் தன்னுடைய நாட்டிலிருந்த ஓர் ஓவியரை அழைத்து, தன்னை ஓர் ஓவியமாக வரையச்சொன்னார். ஓவியர் அலெக்சாண்டர்மீது மிகுந்த அன்புகொண்டிருந்தவர். அதனால் அவர் அலெக்சாண்டரின் கன்னத்தில் இருந்த தழும்பை, அவர் தன் கன்னத்தில் கை வைத்திருப்பது போன்று வரைந்துதந்தார். அலெக்சாண்டர் அதைப் பார்த்து, “என் கன்னத்தில் இருந்த தழும்பு எங்கே?” என்று வியப்போடு கேட்டார். அதற்கு ஓவியர் அவரிடம், “உங்கள்மீது நான் கொண்டிருக்கும் அன்பு, அந்தத் தழும்பை மறைத்துவிட்டது என்று புன்னைகையோடு கூறினார்.

ஆம், இந்த ஓவியர், மாவீரர் அலெக்சாண்டர்மீது கொண்டிருந்த அன்பு, அவரது கன்னத்தில் இருந்த தழும்பை மறைத்ததுபோன்று, ஆண்டவராகிய கடவுள் நம்மீது கொண்டிருக்கும் பேரன்பு நமது நம் குற்றங்களையெல்லாம் மன்னித்துவிட்டது. இன்றைய இறைவார்த்தை கடவுள் நம் குற்றங்களை மன்னிப்பதுபோன்று நாம் நமக்கெதிராகத் தீமை செய்தவர்களின் குற்றங்களை மன்னிக்கவேண்டும் என்ற செய்தியைத் தருகின்றது. அது குறித்து நாம் சிந்திப்போம்.

திருவிவிலியப் பின்னணி:

யூத இரபிகள் தங்களுடைய விவாதங்களில், தவறுசெய்யும் ஒருவரை எத்தனைமுறை மன்னிப்பு என்பது பற்றி அடிக்கடி விவாதிப்பது உண்டு. அவ்வாறு அவர்கள் விவாதிக்கும்பொழுது மூன்றுமுறை மன்னிக்கலாம் என்று ஏற்றுக்கொள்வது உண்டு. இதைப் பேதுரு நிச்சயம் அறிந்திருக்கவேண்டும். அதனால் அவர் தன்னைப் பெருந்தன்மையானவர் எனக் காட்ட விரும்பி இயேசுவிடம், “என் சகோதரர் சகோதரிகளுள் ஒருவர் எனக்கெதிராகப் பாவம் செய்துவந்தால் நான் எத்தனை முறை அவரை மன்னிக்க வேண்டும்? ஏழு முறை மட்டுமா?” என்கிறார்.

பேதுரு தன்னிடம் இவ்வாறு கேட்டபொழுது இயேசு அவரைப் பாராட்டவில்லை; மாறாக, அவர் அவரிடம் “எழுபது தடவை ஏழுமுறை” என்கிறார். இதனை விளக்க இயேசு சொல்லும் உவமைதான், ‘மன்னிக்க மறுத்த பணியாளர்’ உவமையாகும். இந்த உவமை ஆண்டவர் நம்மைத் தாராளமாய் மன்னிக்கின்றபொழுது, நாம் நம் சகோதர் சகோதரிகள் செய்யும் சிறு தவற்றைக்கூட மன்னிக்க மறுக்கின்றோம் என்ற உண்மையை உணர்த்துவதாய் இருக்கின்றது. தானியேல் நூலிலிருந்து எடுக்கப்பட்ட இன்றைய முதல் வாசகத்தில், அசரியா கடவுள் மக்களுடைய குற்றங்களை மன்னித்து, அவரது இரக்கம் தங்களைவிட்டு நீங்கச் செய்யாதீர்” என்று மன்றாடுகின்றார். இஸ்ரயேல் மக்கள் கடவுளின் கட்டளையைப் பலமுறை மீறிப் பாவம் செய்தார்கள். ஆனாலும் கடவுள் அவர்களை மன்னித்தார். அவரைப் போன்று நாமும் நிபந்தனையின்றி மன்னிக்கவேண்டும் என்பதுதான் இயேசுவின் விருப்பம்.

சிந்தனைக்கு:

 மன்னிப்பதில் ஆண்டவர் தாராள மனத்தினர் (எசா 55: 7)

 மன்னிப்பு என்பது இருவழிப்பாதை. மற்றவரின் குற்றங்களை மன்னிக்கின்றபோது, இறைவன் நம் குற்றங்களை மன்னிக்கின்றார் (மாற் 11: 26)

 மன்னிப்பு மனநோய்களைப் போக்கும் அருமருந்து

ஆன்றோர் வாக்கு:

‘மற்றவர்களுக்கு மன்னிப்புத் தேவைப்படுகின்றது என்பதற்காக அல்ல; உங்களுக்கு அமைதி தேவைப்படுகின்றது, அதற்காக மன்னியுங்கள்’ என்பார் ஜோனத்தான் லாக்வுட். எனவே, நாம் மன்னித்து வாழ்ந்து, இறையருளை நிறைவாகப் பெறுவோம்.